Act 22 | TVK | STEP | “!Toxoli xil e tata navan xil tahal Isrel, muteong ni nou! Nisak pisi nisep motin nou pe metemim.”

Acts 22

1 “!Toxoli xil e tata navan xil tahal Isrel, muteong ni nou! Nisak pisi nisep motin nou pe metemim.” 2 Melele xa lalonge taxa di misepin mi xil nggo sepinien Arameak, ladi votei kuhi sung e lateong kuhi ni.

Di, Pol misepin mi xil bitene, 3 “Inou nabe Siu tei xa matestal e Tarsis e provins tahal Silisia. E natematu sung e Serusalem. Inggak, natesukul pe he Kameliel xa tepispisi kuhi minou usil Rae xil na avu nar xil. Natehusil xat Rae xil ak e eheien navan te xeih e Hi nggoni xamim vus xa mudi inggak xosali. 4 Inou mun natepangei ngan xil xa latehusil xat Iesu ba vuma ... natesak ni xil holu lalel. Tiramue xil e atou xil mun, natetal xat xil vus e nateso xil lathe nim te xeih. 5 Vahit musis pisi mi Vatixar te pris xil e vat xil te Kaonsel nar, ma xil lakila lavit rati xa sepinien navan be reitin. Xil iaxa latetis uvei xil tengan nalehi vaha mi tua nar xil xa labe Siu xa ladi Damaskas. Ma natehur uvei xil ak e nateha tengan nital xat Kristin xil te rute ak e nilah xil litilomun limei Serusalem, mei lilong pangas xil sung en.”

Pol Misep Usil Naha xa Testal Mini e Damaskas

6 Pol biteni mun mi xil bitene, “Melele xa di natekakao natemei sangas ni Damaskas, e piniae vari, miehen tei xa minehin pupu texo ut nesao e mei teleluv xol nou. 7 Misak ni natemot natehe tan e rae tei temei minou tehitene, '!Sol, Sol! ?Veneh ma di opangei nou del moletin navan xil mak?'

8 “Ma inou natesis pilei natehit, '?Suv, xouk obe visi?'

“E xi tehiteni minou tehitene, 'Inou Iesu tahal Nasaret xa di opangei.' 9 Tiramue xil xa latehe xamem latepus miehen ak, e latnalong ti rae xa tesepin minou.

10 “Ma natesisi natehit, '?Suv, inou nipol ni naha?'

“Ma Suv tehiteni minou tehitene, '!Tamea e uhe Damaskas! E inggak, moletin tei ihit mese ni mi xouk holesok xil vus xa Hi teling xati tengan ha ti upol ni.' 11 Melele xa rae tesepin tevus, nate manin e metok tevar ve miehen xa teleluv xol nou. Tesak ni ngan xil xa latehe xamem latetal xat heok e lateteli nou tang matehe Damaskas.

12 “E taon nen ak, moletin tei mei tesao ni nou, hisen Ananaeas. Xi tehe Siu tei xa eheien nan nggeih e Hi. Xi tehusil vuol ni rae nar xil, e Siu xil vus xa ladi e taon ak di latemerere ni. 13 Xi temei tesoh sangas visal nou e tehiteni minou tehitene, '!Toxoli Sol, keteh rilomun!' E melele nen ak vari, nateketeh rilomun e natepusi. 14 Di, xi tehiteni minou tehitene, 'Hi na avu nar tehosei xouk tengan ukil nenemien nan, upus Moletin Eo te Polien nan, e ulong rae xati nan. 15 Xi pol ni mak vengan tehosei xouk tengan ha ti uhit mese ni mi moletin xil vus to ut etan naha xa otepusi e otelonge. 16 !Ma taxeak, onararu ti! !Mea soh! Utak kes Iesu tengan ipol ni mei umese ra tesaen xil nam. Uling nenesien nam iti en e umae ni nou niterir ni xouk.'

Hi Bosei Pol Tengan Ha Isetu mi Moletin Xil xa Latave Siu Ti

17 “Dutou ni neta xa testal minou e Damaskas, natetilomun natemei e Serusalem. Melele xa natetak, ba di natesis e vioh te Nim Eo e natepus metuveen tei. 18 E metuveen ak, Suv Iesu testal e tesepin minou tehitene, 'Temanon uhe reling Serusalem vengan xa moletin xil inggak lasakras lataeong ni sepinien nam usil nou.'

19 “Ma natehit rilomun ni mini natehit, 'Suv, xil lakil kuh nou mak. Lakila xa inou iaxa di natehe nim te pispisien xil e natetal xat ngan xil xa laneket e xouk en, e ba di natehas pangas xil. 20 Inou natete rute ak melele xa latehov vin Stivin xa tesa sepinien nam mi moletin xil. E inou natemae ve maten nan e natelaxat eising na ngan xil xa latehov vini.'

21 “E Suv tehiteni minou tehitene, '!Ha! Nisilak tengan uhe ut xil xa sotin ve moletin xil xa latave Siu ti.'”

22 Moletin xil di lataeong kuh ni sepinien xil na Pol. E melele xa misep kokot ni usil ngan xil xa latave Siu ti, lake xati nggeih be nesao e labit, “!Ravasi! !Ravur xoteh meulien nan! !Tavos ti tengan xa xi vameul!” 23 Xil lamuis kei, laso vulmeas be nesao, e lasil rerat eising nae te masoh e di labuil ni ba xati. 24 Vatixar na moletin xil te vaeen tahal Rom misemae ni moletin nan xil tengan lihur Pol ihe nim nae, e ha limeas pangasi tengan ihit kil ti veneh ma Siu xil ak di lamaxan ni. 25 E melele xa labar xati tengan lameas pangasi, Pol misepin mi vat tei na vanut moletin tei te vaeen xa di misoh sangas visali bitene, “?Rae na mol-Rom xil di mae ni tengan umeas hortan xati tei te kantri tahal Rom xosxa latalepisi ti mu?”

26 Melele xa vat ak milonge mak, ma xi ba pus vatixar nan e misisi bitene, “?Di opol ni naha xiak? !Moletin xai be hortan vari tang te kantri tahal Rom!” ^{▼▼22:26 E melele nen ak, rae na mol-Rom xil biteni bit neta sav xosxa eilep xil labas purun movotei xil, e mi hortan xil te kantri tahal Rom xil, lasakras. Hortan xil ak lihe pe met moletin te lepisien itiamu, ti, isa pangasien teni mi xil.}

27 Ma vatixar ak be visal Pol e misis pilei bitene, “!Hit pisi minou! ?Reitin mak xa xouk obe hortan xati te kantri tahal Rom?”

E Pol bit rilomun ni mini bit, “Io.”

28 Ma vatixar bit, “Inou natemei natehe hortan tei te kantri tahal Rom texo suse te xalen ni vatu tei xa mahulong.”

E Pol biteni mini bitene, “E inou, latepes xat nou en.”

29 Melele xa lalonge mak, vatakes, ngan xil xa lateti tengan lisis ravui labe relingi. E vatixar ak, ulin mikan pupu vengan xa bar xat Pol ngamu xa be hortan xati te kantri tahal Rom.

Pol Misoh Pe Met Kaonsel na Mol-Siu Xil

30 Vatixar na moletin xil te vaeen bit vakil kuh ti veneh ma Siu di lamaxan Pol ven. Misak ni, ut milan, misemae tengan lalal rerat sen xil ra he Pol. Di, misis vat xil na pris xil tengan litotan vituei itel moletin xil te Kaonsel. Di, del Pol ba misoh pe met xil.